八月之後, 當然係到九月. 一看通訊錄, 竟然有四位弟兄姊妹生日, 於是又搞一局. 係六七八九月都有慶祝生日. 大家覺唔覺太密? 有得食, 小弟幾時都唔嫌多. 食過北角, 女高音同青衣, 今次係來食乳豬.
之前的節目係去探姊妹G, 同BB女影完大合照之後, 馬上下一站. 難得的係弟兄J兩公婆首次一齊出席我們的飯局, 希望以後日子你們可以繼續留係這個大家庭. 加上弟兄C兩公婆又可以一齊來, 頌揚仔都食住出席, 大家都係好熱鬧的.
不久前先同家人來過, 當然知道要有乜係一定要叫. 又因為人多, 成17人, 都有好幾樣主打係x 2.
鎮店鹵水乳鴿皇 $78 x 2: 9分, 先來的係乳鴿, 人未齊鴿先到, 等人齊已經凍了. 當然, 我們坐的位置係相當大風的. 兩大隻乳鴿, 望落去份量一點也不少. 或許凍了, 感覺上係沒有上次般出色. 鹵水味係欠了點, 定係未混, 小弟吃那件係稍為淡了一點. 不過肉質依然係好嫩滑. 值得再食的.
金牌即燒乳豬 $298一隻: 9分, 人多, 當然係成隻上. 看上去應該都有廿幾三十件皮, 小弟上次吃過, 只要一件好了, 唔知邊個食得最多? 未入坐前已係樓下見到師傅係玻璃房度燒乳豬, 大家來這裡相信也對這個最有期待. 乳豬係先起皮, 切走了肥羔, 沒有那麼肥. 芝麻皮脆卜卜, 入口鬆化香口. 不過好像唔係最熱時上臺, 又係比上一次差了一點. 底下的乳豬肉不太肥, 其實也不俗, 不過大家好像興趣不大, 轉極都有. 小弟勉為其難地吃了很多舊.
粟米石班塊 $98 x 2: 10分, 聽過我去年的偉論都知道, 粟米班塊係小弟的心頭好, 再來這裡, 當然要叫多一次班塊. 要了兩碟, 一人至少分了一舊, 粟米汁就有兩大碟. 分開上的石班塊同粟米獻汁, 令到班塊脆卜卜. 炸粉夠薄, 魚肉新鮮, 熱辣辣, 吃一舊真的不夠喉. 見弟兄C係將粟米汁成碟剩吃, 大家也吃得很滿意.
豉油皇新鮮鵝腸 $58: 9分, 爽口的鵝腸, 鹹了點, 要連芽菜一齊食先不太鹹, 同埋比較細條, 唔夠肥美.
雞蛋煎魚腸 $58: 9分, 雞蛋焗魚腸吃得多, 今次吃的係雞蛋煎魚腸, 一樣香口, 魚腸唔會太腥, 而且煎過的魚腸係比焗的更加香.
金牌拆肉泥鯭粥 $68: 9分, 要了這個宵夜好介紹, 最初仲以為晚市要收另外一個價錢, 原來係無分晚市或者宵夜價. 泥鯭粥有拆肉同原條兩種, 原條貴$10. 見拆肉的叫得做金牌, 就揀而樣. 粥底係好靚, 煲得好綿, 魚肉已拆, 無骨, 好香, 相當出色的粥品.
千茋米酒雞(清遠雞半隻) $78: 8分, 好濃的米酒味, 食落口件雞係已經盡吸收了那份酒香, 加上一直地煲, 去到尾係越來越濃的, 個湯底係非常濃郁, 不過就唔係好多雞肉.
生炒排骨 $58: 9分, 意料之外地出色的一碟, 好夠鑊氣, 面頭的粉炸得脆卜卜, 入面的肉仲保持到好嫩滑, 甜酸度剛好, 接近校友的水準.
金銀蛋浸莧菜 $52: 8分, 為弟兄C而設, 當然唔敢食太多, 留番俾佢. 菜新鮮夠嫩, 也不錯.
孜然寸骨 $68: 7分, 相當濃烈的香料味, 好新彊, 不過燒得好像過了火, 豬肉係老了點, 不太鬆化, 實實的.
招牌豉油皇炒麵 $48: 9分, 炒得無乜油, 夠鑊氣, 麵條幾彈牙, 不失為招牌.
生滾田雞肉丸粥 $68: 9分, 跟泥鯭粥一樣出色, 那個粥底當然係無分別, 令人吃完仲想再吃, 吃了一件田雞, 也不俗.
口者口者唐生菜煲 $48 x 2: 9分, 差不多每臺都有一煲, 唔知是否店方唔夠煲,要洗煲先, 係等了好耐先來的一碟. 唐生菜夠新鮮, 蝦醬香口, 依然吸引. 弟兄C, 不好意思, 讓你空歡喜一場.
壽包 $18 x 10: 9分, 拳頭一樣大的壽包, 包夠鬆化, 蓮蓉好香, 小弟馬上要了一個. 但係大家好像吃不下了, 小弟唯有再跟弟兄S分另外一個, 我的那份係大大半. 連吃差不多兩個包, 加上弟兄J引我笑, 真的不容易吃完. 不過大家應該看這個表現看得很高興.
食物水準相當好, 價錢也合理, 環境也好, 令人滿意.
相信是晚係近幾局食得大家最開心的一晚. 小弟也非常高興. 下次再表演過.
評分
味道: 9/10
環境: 8/10
服務: 8/10
抵食: 8/10
推介度: 8/10
餐廳資料:
新斗記
佐敦長樂街18號18號廣場地下及1樓
2388 6020
沒有留言:
張貼留言